得權者敗｜薛可正
驚方將721案件，眾目睽睽下用乾坤大挪移打算指鹿為馬龍門亂搬，全個香港Facebook都表示震驚，齊齊出鹿圖著黑衫，繼續表達自己嘅訴求。面對呢一種指黑為白嘅做法，我開始覺得連驚訝都可以慳返，一班人喺呢一年祼跑咗幾十次俾我哋睇，又使乜再驚訝佢條嘢有幾短，交哂反應畀佢知，我哋有幾討厭呢啲畫面。
佢哋就係有持無恐，你哋就係無佢辦法。
大部份香港人已經不停進步，該做嘅事慢慢上手，愈做愈多，愈做愈好。不過二百萬人各有山頭，力量聚集之後總會有權力出現，一年前嘅齊心老早已經煙消雲散，今時今日除咗面對香港政權之外，呢班香港人仲要面對好多昔日同路嘅指控、中傷甚至追擊。
喺呢度我無指明受害同攻擊雙方，因為提告被告呢啲角色地位，喺呢個時代好似走馬燈一樣，一眼閃過就可以面目全非，好多人樂在其中，因為好多人喺呢啲糾纏中搵到存在感，感覺重要性比起香港大環境嚟得重要。
權力會令人迷失，甚至腐敗。一個普通人亂世之中得到權力，佢希望可以做出更多正確嘅事去拯救某一啲嘢。但「拯救」一詞本來就係相向，我要救一個道友出毒海，可能反過來畀佢鬧我阻住佢享受世界。
最後風起了，沙麈愈大，亂世愈亂，得到話語權嘅人總係用一片丹心，以為自己嘅正確就係正確，唔理場口唔理時勢就直斥其目標不是，最後變成雙方開戰、冷戰…總之就無好收場。
一個攝影專頁主動搵建制派人士獻媚，最後好處得唔到仲要被賣兼畀香港人鬧到仆街，快快手出個「抱歉」Post都於事無補，喺呢件事有好多自以為有話權力嘅人，透過網絡周圍搵人鬧，但凡同呢間公司合作過嘅人同Model都要全部落鑊，不分是非時間黑白，見人就留一句「藍店不了」，最後又係做成兩邊罵戰，無日無之。
香港好多網民，同樣都係以為自己匿喺網絡後面，就算講啲乜嘢，你哋都係無佢辦法。走上連登，見到三兩條五毛講啲廢話，就馬力全開咁開戰，最後隔離張三李四又加入戰團，變成一場大戰，呢啲大戰喺連登呢類平台每日不停消耗香港人嘅團結，全因為大家都覺得自己有話語權。
有時會諗，連登上嗰幾個五毛希望真係五毛，為嗰一角幾毫上網搞風搞雨，總好過係一啲讀書唔多又自以為有話語權嘅人學人開班教書，廢話連篇。
得到權力的人，更加要三省吾身，咩時間講、咩情況講、會唔會傷害人又或者有冇需要講，唔需要講嘅可以私下搵朋友講，揀公開講前就要評估一下影響有幾大，就算影響唔到你，都諗下影響唔影響到其他人。
如果成隻哮天犬咁見乜都嘈一餐，咁同你討厭嘅人又有咩分別？
————————————————————————
薛可正TBC文章收費平台《榕樹頭唔斷氣》現已推出
隨意門：https://pr7d8.app.goo.gl/GSAM
每周定時更新文章，
九月推出全新連載故事，
文字有價，多多支持。
文章列表：
1.「我的成長地」〈免費〉
2.「置樂」 〈收費〉
3.「1991年9月1」 〈收費〉
查詢網址：tbcstory.com
********************
IG：sithoching
Page：薛可正
Search